எங்களை பற்றி

• கலைகளின் கருவூலமான செங்கல்பட்டு மாவட்டம் மாமல்லபுரம் அரசினர் கட்டடக்கலை மற்றும் சிற்பக்கலைக் கல்லூரி என அறியப்படும் இக்கல்லூரி 1957இல் சிற்பக்கலை பயிற்சி மையமாக தமிழ்நாடு அரசு தொழில் மற்றும் வணிகத் துறையால் உருவாக்கப்பட்டது.
• அறிவியல், தொழில்நுட்பம், இலக்கியம், பயிற்றுவிக்கும் கல்லூரிகள் அல்லாது கலைகளை மட்டுமே போதிக்கும் ஒரு சில கல்லூரிகளிலும் தனித்துவம் பெற்றது இக்கல்லூரி! இது மரபு கலைகளுக்கான போதிமரம்!
• சான்றிதழ் படிப்பை மட்டுமே வழங்கிக் கொண்டிருந்த இக்கல்வி நிறுவனம் 1974-75இல் தொழில்நுட்ப கல்வி இயக்ககத்தின் கீழ் கொண்டு வரப்பட்டு, பல் தொழில் பயிலக படிப்புகளுக்கு இணையாக இம்மையத்தின் பயிற்சிகளை மேம்படுத்தும் வகையில் பாடத்திட்டங்கள் மற்றும் தேர்ச்சி திட்டங்கள் அமைக்கப் பட்டது. அத்துடன் தமிழ்நாடு கட்டடக்கலை மற்றும் சிற்பக்கலைப் பயிற்சி மையம் என பெயர் மாற்றம் கண்டது.
• 1980-81இல் தமிழ்நாடு அரசின் அனுமதி பெற்று சென்னை பல்கலைக்கழக இணைவோடு கோவில் கட்டடக்கலையியலில் மூன்று ஆண்டு கால பட்டப்படிப்பை துவக்கியது. பின்னர் 1984இல் கற்சிற்பம், சுதைச்சிற்பம், உலோகச்சிற்பம் மற்றும் மரச்சிற்பம் என்ற நான்கு விருப்பப்பாடங்களை உள்ளடக்கிய மரபு சிற்பக் கலையியலில் பட்டப்படிப்பு (பி.எஸ்.ஸி மரபு சிற்பக்கலை) என அதன் வளர்ச்சி தொடர்ந்தது.
• காலத்தின் தேவைக்கேற்ப, தொழில்நுட்பக் கல்விக்கழகம் நிர்ணயித்த தரத்திற்கு மேம்படுத்தும் வகையில் கலை, கைத்தொழில் மற்றும் பொறியியல் கல்லூரிகளுக்கு இணையாக 2000-2001இல் நான்காண்டு பட்டப்படிப்பாக கோயில் கட்டடக்கலையியலில் இளங்கலை மற்றும் மரபு சிற்பக்கலையியலில் இளங்கலை பட்டமும் துவங்கப்பட்டது. கூடுதலாக மரபு ஓவியம் மற்றும் வண்ணப்பிரிவில் இளங்கலை பட்டப்படிப்பும் துவங்கப்பட்டது. விரைவில் முதுகலை பட்டப்படிப்புகள் தொடங்கவும் நடவடிக்கை மேற்கொள்ளப்பட்டு வருகிறது.

கல்லூரியின் கலை சாதனைகள்

• கலைகளின் மொழியில் கல்லூரியின் சாதனை பட்டியல் நீள்கிறது – பெயரும் புகழும் சேர்க்கும் கலை படைப்புகளில் ஒரு சில ... சென்னை வள்ளுவர் கோட்டம், பூம்புகார் கலைக்கூடம், தஞ்சை தமிழ் பல்கலைக்கழக நிர்வாக மற்றும் நூலக கட்டடங்கள், மதுரை முத்தையா மன்றம், சென்னை அண்ணா வளைவு, மதுரை காமராசர் பல்கலைக்கழக தோரணவாயில் ....